Eune articl’ye dé 1923:
Viyant chein que l’Sieur Caouain mint dans la gazette d’Samedi passé, j’espèthe que l’Coumitté Sanitaire s’en va décider qu’il est grand temps de désinfecter l’cervelet de chut oisé de touot l’ponsi de ses menteries car il a grand besoin d’un spring cleaning pouor empêchi dithet bagoulage.Un tas de menteries et pas un mot de vérithèt, fouai de Marie Hibou.Et pis, si j’avons tchicques rows n’v’la qui n’vous intéresse pon aussi n’en’v’chin assez sus chu chapître.* * *J’n’sais pon pouortchi mais j’sais bein qu’il y a hardi d’gens qui aiment mus l’s’oeus bruns que les bliancs. Et pouortant la couoleur d’la cruque n’change rein à chein qu’est d’dans, même si ch’est un poussin mais tchès que voulez ch’est d’même.Achteu, y faut que j’vos dise que d’pis deux ou trais semaines j’sis bein puzzlée par des r’merques que j’ai ouïes.-Sièz nous, le lait est blianc et pon brun!Mais Missis j’criyais qu’il en était d’même partout?Ch’tait du bord de l’Eglises iou qu’il n’y a ni baptêmes, ni neuches, ni enterrements – pouor achteu – que j’oui chunna.Du lait brun? Mais tchi que chunna veur dithe? Iou qu’est la vacque qui douonne dithèt lait sans faithe laid? Y faudra que j’d’mande à Willy qu’acati des viaux dans chutte paraisse; ou p’t’être au sien qui mint une bouteille – plienne bé seur – dans sa pouchette et en vidgi la maintchi d’une autre dans son tumbler, l’grand jour que l’ber était pour rein au Pavillon.Tais ta becque Marie, car l’s’esprits sont bein animés dans chutte paraisse.* * *J’sis bein aise d’vais que l’affaithe de l’Eglise de St Jean s’en va être settlée sans rein aver à faithe avec les hommes d’affaithes qui engraissent lus corps par les discords de pouorres corps qui n’peuvent s’mettre d’accord, couomme s’f’rait l’sien de la Vouais des Iles s’il tait encouore de chu monde de misèthe.J’en ai grand r’gret pour les siens du football club de chutte paraisse qui s’ront obligés d’aver une collecte ou un flag day pouor acater un gramaphone.Ch’est que, viyous, les siens du football club ont lus meetings dans l’parish hall et que l’orgue est bein utile pour revilletoner un miot les siens qui lus endorment et nous peux jouer autre chose que des cantiques avec chut orgue, n’est ce pon, garçons!* * *Dans la p’tite paraisse des blieus et des rouoge… d’autrefois il y a des gens qui dorment couomme les câts.N’v’la pourtchi qu’un Moussieu s’en va l’vèr la main annièth oprès sa grande surprinse quand y vit sur la cauchie des grands de sa paraisse qui attendaient s’n’arrivée par l’bâté pouor l’y d’mander d’s’porter candidat à la poste de Député.Ch’est que Dod est tréjous là pouor tchicques chose, n’est-ce pon?* * *N’v’chein une p’tite scène qu’est la pure, pleine et entièthe vérithèt, fouai de Marie Hibou, et qui s’passi tchique bord dans la vallée de St. Laurens.Dans chu ménage nous garde l’pain dans une terrine pouor l’aver pus frais.L’autre jour, la Missis déshalli iun des pains et viyant qu’il y avait un p’tit creux oulle crut que ch’tait une souothie qui en avait grignoter un miot; mais v’la qui ne pouvait pon être viyant que la terrine était bein couverte et que pour seur il n’y avait pon de trou. Fallait craithe que ch’tait que l’pain avait été mal bouolangi.Deux jours oprès, oulle déshalle un autre pain pouor faithe les beurrées pour l’thée. Encouore une fais il y avait un creux et pus profond que l’autre. Enfin oulle s’mint à couoper l’pain quant touot accouo oulle laissi touot couort et sortit bé vite pouor appeler maître Tom, qui s’cauffait au soleil et qu’oulle rameni en l’portant dans ses bras!Oprès chunna, oulle print l’pain et s’mint à l’chacqui ovec l’résultat que chutte affronté souothie, dont elle avait vu l’s’yièrs dans le creux du pain, dut s’déhaller et maître Tom, l’cât d’la maison, l’attrapi et en fit un buan fricot!Chunna est la pure vérithèt.7/4/1923