L’boss veut une colonne de ton gnollin pouor ly aidji à rempli sa gazette. Ch’est d’antchi, dépêche té Marie.
Couomme c’était l’mousse de l’atelier qui vint me douonner chu message, j’ly réponni que je n’tai pon d’heumeuthe d’écrithe rein en touot et que l’boss pouvait allait s’faithe quatorze si chunna ly plaisait.
Sais tu qu’il est au lièt, qui m’réponni et n’peu pon s’t’nir sus ses gambes.
Et tchès qu’il a donc, car un oisé couomme ly rester au lièt n’doit pon ly faithe plaisi et j’sis seur qu’il est d’une humeuthe de tchan viyant qui n’peut pon s’rendre à l’office vais chein qui s’passe et écouté les r’marques des uns et des autres dans l’espoir d’y glaner tchiques p’tits buts pouor mettre sus sa gazette.
– Il a qu’il est en train d’ramasser tchiques profits d’la djerre !
– A compter ses intérêts sus ses wars loans et ch’est pouor chunna qu’il est au lièt.
– Oh ! mais, tchi gnollin et ch’est pouor chunna continue y s’ra bétot temps d’ly nommer un tchurateur. N’v’la qui n’me rendra jamais malade mé, car mes profits de la djerre furent la minsèthe. Et pouor seur ch’n’est pon mé qui s’en va tracassi l’p’tits boudins de ma pouorre cervelle pouor aider à ly rempli sa gazette.
– Ecoute, Marie, tu n’comprends pon, car sans chunna tu n’f’rais pas de dithèt ermerques. Chein qu’il appelle ses profits de la djerre ch’est ses blessures, car tu sais bein qu’il en pari de près. Eh bein, ieunne de ses blessures s’est rouverte et n’v’la pouortchi qu’achteu il est au lièt.
– Si ch’est d’même n’v’la qu’est différent, car opprès touot nous a tchique fait pitié d’un tchan qui a un mio de mâ.
Pouor dithe la vérithèt j’criyais que l’mousse était à me conter des sornettes, car il est un miot farceur de sa sorte et j’sais bein qu’il aurait grand plaisi à m’attraper avec ses accraithes. Je ne dis rein mais j’pensi, j’irai à l’office bétot et si l’boss n’est pon là ch’est qu’il y a de la vérithèt dans chein que chu mousse vient de dithe.
J’y alli et j’vit que ch’tait l’foreman qui était drièthe l’compteur. J’ly d’mandi si ch’tait vrai qu’il y avait ieunne enquête en allant.
Y m’répondit qu’il ‘nen avait rein oui, mais qu’en touot cas l’boss était trop mâ pouor pouver y aller s’il y en avait ieunne.
Je n’fit pon mine de comprendre ou d’être surprinse par chute ermerque, mais n’v’la qui fut suffisant pouor me faithe comprendre que ch’tait la vérithèt que l’mousse m’avait dit.
Acheteu pouor remplir une colonne ch’est qu’il faut de tchi et couomme l’affaithe est morte dans les paraisses où l’on est trop otchupé à l’entouor des patates et à distchutter chein qu’en s’ra du scheme de l’Union, n’v’la qu’est une job pouor seur.
Mais touot en d’visant j’couommenche à m’apercevoir que n’v’la quassiment la maintchi de ma job de faithe avec chu bagoulage et d’pis que ch’est d’même j’vos raconterai une farche qui fut jouée, il y a tchiques mais de chunna, dans la paraisse au p’tit Jack.
Dans chutte paraisse il y avait ieut de grandes neuches, mais couomme les nouviaux mariés n’étaient pon d’s’enfants et que ch’tait hiver, tout avait été préparé à l’avance pouor cauffer la chambre.
Quand nous eut bein fêté les invités et abreuvé les seins qui vinrent tither des coups d’arme dans l’bel, même qu’il y eut tchiques ozannes de pitchies, quand vint un temps, les nouviaux mariés quittèrent la compagnie pouor aller lus couochi.
Nous allumi l’feu dans l’foyi de la chambre et oprès un job à la faithe prendre n’v’la t’y pon que la fumée obligi de l’éteindre pouor n’pon être enfuntchi à en mouorrir.
Nos gens ni comprenez rein en touot car chutte cheminée avait été ramonée peu de temps de d’vant et pouor seur y n’d’vait pon y aver de suie.
Le lendemain nous eut la clief du mystère, car ch’tait des pouques qu’avaient été minses dans chutte cheminée et n’v’la pouor tchi que la fumée n’pouvant s’en aller par à haut ervenait dans l’appartement.
Chunna est la pure vérithèt. Touot d’même est ce des tricks ou des farches à jouer surtout à d’nouviaux mariés qu’avaient grand besoin d’lus récauffer et de lus erposer.
L’sien qui fit chunna a bein fait de taithe sa bec, car s’il avait été happé il y aurait eu du fredas. Mais couomment savait t’y que nous gens avaient dans l’idée d’allumer du feu pouor lui cauffer ?
28/5/1927