J’sis un bein vilain ouêsé et personne ne voudrait de ma carcasse pur un fricot. Savous que j’en sis bein content, car si j’avais tèt un pithot ou un picot, j’trembliéthais hardi dans chutte saison ichin. J’éthais grand peux d’êtes pendu à la boutique de Mess Swanger ou sièz Mess Kerdal.
Ch’est pour chouna que j’me réjouis d’être un si vilain ouêsé, bon à rein, même pas à stuffé, car depis que j’êrache des plieumes pour vous êcrithe, i’ n’en reste pas fort sus ma carcasse.
I’ vos ont dit dans la gâzette que j’tais hors à St. Cliément. V’là qu’est la puthe véthitèt.
Ou m’créthai’ s’ou voulèz, mais aussi vrai que je ne semblle pas à d’autres ouêsiaux d’ma race, j’ai veu Georges et Fraînque bèthe unne fais ensemblle !
I’ s’allaient au Châlet et sièz Mac touôs les deaux. Je n’sai si ch’est mé ou Fraînque qu’est v’nu rouoge, mais je vos assèuthe que j’ai veu tout rouoge.
Ch’tait la séthée du meetin’ et j’entendit des bieus qui faisaient de bein drôles d’ermèrques.
Ch’est chutte famaeuse coupe qu’est la caouse de tout chonna, à meîns que ch’ne s’sait le cllios qu’un grand d’la pâraisse ne voulait pas i’ y’a daeux ans, tchultivé li-maîmme et qui dis : J’espèthe qué m’s’anmins ne l’prendront pas n’tou.
Et l’aoutre l’î réponnit : Si ch’est là tes principes, ch’n’est certainement pas les meîns.
J’vos dit mé, caouan, qui sait bein des choses, mais qui sait èttou taithe sa bec quand il l’faout, j’vos dit que v’là qui marche comme eunne tchéthue à tchans.
Quand il’eurent lus meetin’ de la Sociétèt, y’en avait tchi voulaient avé eunne êlection pour membre du coumiti. John, Ph’lip et Fraînque furent proposés pour daeux vacances.
Charles, qui sait bein qué toutes chès chican’nies là finissent par faithe pûs d’ma qu’aoutrément, saouvi la situation. I’ lûs dit qué Johnny, sân biau-frèthe, voulait se r’tithé, et ne v’là poutchi i’ n’y’eut pas d’êlection.
Oh ! j’pouôrrais bein vos en conté bein d’aoutres, mais ou’ savez, i’ y’a un grand mâjeur d’artil’lie, et ma fingre je n’voudrais pas qui tithe le canon du libelle ou de la remontrance contre mé.
Nannin, j’ai trop paeux d’la badjette à moussieu Ouillium, et mé qu’aime bein à m’proumné, je n’voudrais pas qui m’mettrai en cage. Ch’est pour chounna que je n’veur pas vos raconté la sçainne que j’ai ouï d’eunne pouôre vacque. Et pîs, pour en dithe le vrai, j’n’en crait pas un mot de ch’t’histouèthe-là.
Au mais d’Juin tchi vein, si j’n’sis pas crévèt d’ichin là, j’pense qui y’étha tout plien d’fonne dans chutte pâraisse là.
Mac f’tha des sou’, j’vos l’asseuthe.
Comme nou’ dit :
Tchi vivra verra. En attendant, j’vos souhaite à tous un bouan Noé. J’espèthe èttou que le plum-pudding ne f’tha pas trop d’ma’ à little Mary, comme disent les Angliais.
A l’annaie tchi vein, garçons.
25/12/1909
