Ah, mes bouannes gens, je n’sai’ pon de tchi bord de donner … des ailes. I’ y-a tant de travas pour le caouan achteu et chouna par un temps que nou vai’ pus un boustre de cat dehors, maîme pas iun des siens à Mess Bisson, du Bas de Square, li qu’en a tréjous treîs ou quatre alentou d’li.
Ou’est qu’j’ai tèt chutte semaine, mais quasiment dans toutes les pâraisses.
J’tais dans man biau cliochi quand i’ futent en députation vers Abraham, le rouai d’Egypte et j’entendi le divers speech que fit un grand offici d’police sus les attroupements.
J’sis seux que M. l’Député et les siens d’la députation taient contents de savé qui y-a des attroupements au Dimanche au sé dans les carrefours. Vieilles nouvelles, M. l’offici, et de drôles de sujets à raconté à une députation vers un Deputé !!
J’sis bein aise que m’n’anmin d’Egypte du Carrefour, dit ce yes que touos chés d’là au meeting voulaient l’entendre dithe.
Quand j’ouï toute la haute ville d’viser et pâslé sus la louai pour protégi les ouaisiaux, les pithots et les picots èttou, coumme iun d’ieux s’fît, j’criyais quasiment que ch’tait le speech d’un nouviau candidat et ma fé j’en trembliais de craithe que la gerre allait erkémenchi dans chutte pâraisse, iou que tout est bein calme acheteu, grâce à chés messieurs qui préfèthe la paix que la gerre.
– J’vos ai pas pâlé unne seule pathole sus l’carnaval. Ch’est vrai qu’unne p’tite histouèthe vos satisfaithait de chutte grand bordèe.
I’ y’en a qui disent que l’papi ne r’fusent pas l’encre, mais, chose bein drôle, dans chu cas ichin le papi a erfusé l’encre.
Chouna veindra p’t-être avec le temps.
***
Dans la pâraisse de la belle parisienne, nou’ dit que va y’avait opposition. Tout chouna ch’est pour digoté un miot le bel ouaisé qui suffle le matin et l’sé dans sa chaumière. J’sis seux que l’Seigneur des Montannes n’en voudrait pas et coumme j’l’ai ouï dithe à un grand d’là pâraisse, à la vendue de la Hougue Boëte, maîme quand non’ l’y dounnait chent souverains i’ n’prendrait pas. Ourèe pour li ; ch’est un houmme d’honneu qu’a dounné sa pathole et i’ la r’titha pon.
Mais i’ s’en va y-avé èlection pour Chantgni. Walteur n’en veur pus. J’en ai grand r’gret car Walteur est un nice corps. J’ai ouï qu’un gros du côté de Millbrook voudrait bein la job. Tchi qui l’proposera ?
19/11/1910