Le “caouan” est allé à Caen ! Boustre mé qu’était d’la bordée je n’l’ai pon veu. Ni mé nettou comme se faisait un grand St. Cliément.
Eh bein bouannes gens si vous n’avez pon veu l’caouan i’ vous à bein veu et chein que j’vais vos raconté en s’ra la preuve.
Il alli èttout tchique bord d’la Violette et ma fé en fut ébloui. I’ viyait tout en violet et chès pour chounna qui n’ditha pon mot sur chein tchi s’passi par là.
I’ sait bein èttout que Frainque n’alli pas dans le motor et il le vit ès courses.
Pour la première fais, Frainque et s’namin le p’tit Johnnie que n’ou viyait tréjous ensemble se s’parirent.
Coumme ou savèz bouannes gens, i’ d’vaient allé à Falaise en motor, ne v’la qu’nos grands hoummes montirent dans quatre taxi. Eh bein ! deaux des motors bustirent en route et v’la tchi pouorrait bein causer un procès.
Ils ont payi avec protêt et coumme j’vos l’dit i’ s’en va y’avé du feu satchi.
George d’en face le marchi à paison tèt avec ieux et treis autres que j’connais bein qui n’habitent pas la paraîsse de St. Cliément.
Coumme se faisait un houmme de louai dans l’train. Ch’est honteux et n’ou appelle chounna unne excursion de municipalité.
D’mandez à Charles t’chi vint touos les jours par le train pour se rendre à s’n’office.
Pour de mé caouan, j’sis d’avis qu’tant nous est pus nombreux tant pus s’amuse.
Je vos dithe bein d’aoutres choses sur ce trip, mais i’ faut pas avé trop d’bagout et pis chein qui s’est passé Mercredi au sé est plus intéressant.
Les daeux vièrs Chantnyièrs s’n’allaient erprendre lus poste, mais T. P., pas P. T. en français, ou’ savez bein, le gros Tom du mannyi, dîs que si y’avait un treîsième candidat i’ n’fallait pas l’proposé.
D’vant l’meeting, j’vit un grand d’la pâraisse déshallé un mio d’foolscap de sa pouchette et i’ d’mandit à un co’ dé signé avec sa piume … en steel, bein entendu.
J’pensi en mé-maime, i’s’en va y’avait de fanne au meeting. I’ faout que je’m muche de tchique bord.
J’savais bein que l’bouanhoumme Ph’lip, ch’ti là qui sait combein qui y’a d’mousses qui naissent dans la pâraisse, je savais bein qu’il entendait haout et qu’il a la veue faiblle, et j’pensi que j’lî passais souos l’nez sans qu’il en verrait rein. Ne v’là pourtchi j’tais preumi entrèt dans l’parish hall et vite je’m muchi dans eunne tithètte.
Après que l’boss de la pâraisse eut lut un tas d’papièrs, i’ d’mandit si tchiqu’un avait un candidat à proposé.
Ou’ m’créthez s’ou’ voulez, mais y’en avait treîs qu’avaient des papièrs de nomination dans lus pouchette et pas iun qui voulait dèshallé l’sien.
Le mâjeur n’aimait pas chounna et il ‘tait mârri. S’il avait ieu sa squad de gunners, y’en a p’t’être bein qu’éthaient ieu triste mîne.
Dodd fut proposèt, et oprès George Ph’lip se l’vi à san tou pour proposé Ph’lip. Si G. P. ne s’était pas prêssi tant, p’t’être bein que l’papi qui s’trouvait dans la pouchette à James, ch’ti-là qui r’mue les sous à la pelle et qui f’thait bein d’mettre daeus-treîs p’tits jaunes dans ma niche ; vèthe, je cré que l’papi éthait tèt dèshallé et nou’ z’éthait ieu eunne élection.
Ichin finis la preumièthe lesson.
20/8/1910