Si la pâraisse vos votait tout pllien d’sou pour faithe un p’tit trip et si la pâraisse vos dîsait : V’là qu’est bein, tu peux t’n’allé àLondres, te louogi au Cecil Hotel et nou’ paietha touos tes frais. Si nou’ vos disait tout chounna à condition de rendre visite à cèrtains mêssieux et lûs dithe daeusse-treîs mots, est-che qu’ou’ ne s’êtes pas dans la jouaie.
Mais dia, si chès mêssieux vos f’thaient à comprendre, tout arrivèt là, qu’i’ n’ont pas l’temps d’èscouté vos raisons, que l’mûs pour vous est d’ertouanné et d’resté à vos caouffé siez vous ; qu’avec tout l’vent et les achies d’plluie, i’ n’fait pas bon viagi, et qu’ la mé est fort rude et pourrait vos détraquer l’estouma, séthêtes ‘ous content de veîs vot’ bieau p’tit viage s’en allé en fumée comme du p’tun ?
Ch’est ch’la qui faoudrait d’mandé à Moussieu Untèt.
Drôles de patholles. P’t’être bein qu’la s’maine tchi veint nou’ z-y comprendra tchique chose.
***
Coumme j’vos l’ai dèsja dit, j’ai tèt à eunne vendue dans la belle pâraisse à la belle parisienne.
V’là tchi s’pâssait siez m’n’anmin ‘By Jim,’ le seul houmme en Jêrri qu’ait ieu eunne médaille pour bons et loyaux services à sa pâraisse ; eunne médaille qu’a tèt bein méthitée, chette-là, car jammais inspecteur de k’mins ne fît mûs sân travâs.
Unne belle armouèthe à treîs pids, qui m’a servi d’niche pus d’unne fais, fut vendue.
D’mandaiènt, John voulait l’y faithe copé les treîs aoute pids, parce qui y-en avait iun qui mantchait. V’là qu’éthait tout gâté et ma fé, quant au Caouan, il éthait mus aimé laissi l’armouèthe châtchi un miot, que d’l’y copé les pids.
Nou voulait vendre un èstchelle, mais sabre de bouais, tchest qu’est maître.
Les vaques futent bein vendues et coumme se faisait m’n anmim : J’ai r’fusèt tant pour chutte vaque là. Ch’tait la véthitèt, car ètout iunne des pus belle vaque de Jerri.
Le p’tit Connètablle fit la r’merque : Pâslèz pas d’maîme.
Et pourtchi pas, mon doux, puisque ch’est la puthe, plianne et entchèthe véthitèt.
Coumme se faisait m’n anmin : ch’est tout du utmostsièz nous, coumme dans la House of Commons. I’ n’y a pon de maison dans la vingtaine qu’a un stock de vaisselle comme là.
La vendue alli bein, mais si l’Connêtablle l’éthait k’menchie, i’ l’éthait p’t’être bein ieu daeux ou treîs louis d’pus de fait.
Que d’honneu ch’t-annèe et qu’il a bein raison d’être fier coumme un roué.
Et pîs, tch’est qu’était content èttou ? Ch’est l’Connêtablle, un moussieu de paîds qu’est l’boss des Chasses et d’sa pâraisse, et iou que mé, Caouan, j’irai Lundi, avec la députation, car ch’n’est pas l’arme au sergent-mâjeur d’artil’lie qui f’tha d’paeux au caouan.
Jammais l’Counnétablle n’avait ieu un miyieu dîné. Oh ! my, mais ergardez : eunne rouelle, du jambon, du poddin d’riz, et bein d’aoutres choses, et s’il avait voulu eunne tâsse de thès de biau tea-pot.
I’ y’a des gens qu’ont l’affront, tout d’maîme. V’là qu’est honteux. Av’ous jammais veu. Y faut y en avé d’l’affront de v’nin dîné sans s’être changi, pas seulement eunne bianche djaînne.
***
J’ai ouï, au Britannia, que Fred s’en va erprendre pour Chantnyi. Walteur n’en veur pûs, et l’aoutre Walteur des Siez Rues éthait eunne belle chance. Mais si Edward jun., qu’en veur bein èttou, est candidat tch’est qu’en s’sa, bouannes gens ?
22/10/1910