David Bowie a mouothi. Né v’chîn eune vèrsion Jèrriaise dé sa chanson Life on Mars:

David Bowie has died. Here’s a Jèrriais version of his song Life on Mars:

Ch’est un catico des pus p’tits
pouor la hardelle ès g’veux d’souothis
mais sa m’mèe est à braithe Nânnîn
et san p’pèe dit dé n’pon èrv’nîn
mais sén anmîn est hors et au d’sans
et ou va par san rêve avant
au siège où’est qu’est la miyeu veue
oulle est haitchie d’l’êcran d’argent
pouor du film, ou n’en s’sa pon d’hait
car ou l’a vêtchu pus qu’dgiêx fais
ou pouôrrait êcopi ès fos
coumme i’ lî d’mandent d’èrgarder des

mat’lots batilieurs à danser
Man vyi! Coumme i’ sont à bouogi
Ch’est un show bigbichi
et èrgardez chu chent’nyi
tch’astique un pouôrre médgian
Man vyi! Ch’est-i’ qu’i’ saitha, li,
qu’il est dans l’show d’pus haut prix
Nou vit-i’ sus Mars?

Épis l’Améthique, ou porte la taque
dé Mickey Mouse tch’a grandi en vaque
Qu’i’ sait célèbre, châque ouvriyi,
car Lennon r’est sus l’marchi
V’là les souothis par grands mouochieaux
d’Ibiza jusqu’en Êcrého
Man Bieau P’tit Jèrri est à banon
pouor ma méthe, man tchian, mes bouffons
Pouor du film, jé n’en s’sai pon d’hait
car mé, j’l’ai êcrit pus qu’dgiêx fais
Nou s’en va l’èr’êcrithe dèrché
coumme j’té d’mand’dai d’èrgarder des

mat’lots batilieurs à danser
Man vyi! Coumme i’ sont à bouogi
Ch’est un show bigbichi
et èrgardez chu chent’nyi
tch’astique un pouôrre médgian
Man vyi! Ch’est-i’ qu’i’ saitha, li,
qu’il est dans l’show d’pus haut prix
Nou vit-i’ sus Mars?