Mé, j’sis eune vioge, et j’aime mangi l’s avièrs!
Les fil’yes sustout sont douoches et d’un bouôn goût.
Lus pids sont un fricot – jé chuche lus ièrs,
et j’avale lus ouothelles entchiéthes étout!

Mé, j’sis eune cocangne. Tchai don dans man pits!
Atout mes grîns j’aime dêchither les p’tchiots.
J’les hale souos l’ieau à seule fîn d’les mangi;
Jé gruge lus chai, lus muscl’yes, lus pé, lus os.

Mé, j’sis lé croque-mitaine tchi hante les c’mîns.
Les p’tites fil’yes sont malaûc’seuses et pouôrries!
J’n’aime pon les d’vouother car y’a un r’tunfîn,
mais les garçons ont un goût d’èrva-s-y.

S’ous êtes, eune séthée, happés et mangis
par tchique dêmon ou monstre âffreux. Mêfi’-ous!
N’vos pliaigniz pon! Ch’n’est pon du tout poli
d’pâler en stoffant la bouoche d’un ouéthou!