Dans ch’t’ articl’ye du Morning News du 4/10/1912, Piteur Pain explyique coumme tchi qu’un Bazaar, un marté et eune tabl’ye avaient êtibotchi du hèrtchîn siez li:

Piteur Pain‘s daughter hits the nail on the head, and Piteur gets hit around the head, as a result of “bazaar” goings-on in 1912:

A bon d’gens fûtent assez surprins d’vaie l’estat dans tchi que j’tais Samdi passé, quand j’fut m’informé du prix des p’tits animaux dans la Féthe a Bêtes: man bras gauche pendu dans un mouochet d’coton, et du gris papi sus m’n’yi. Ch’n’est rin d’consequence! Seul’ment l’résulta d’eunne p’tite distchusion qu’j’eûmes ensembye, Laizé et mé, l’aut’ sé. Ou disait, véthe! mé j’disais nouffét! Ou souot’nait que ch’tait dème! j’pretendais l’contraithe! ou disait, jommais d’la vie!

Et ch’est pour cheunna qu’j’ai l’yi couert de pouothet saupoudré d’camphre.

Ch’est raport a Lonore que y’a yeu un p’tit mio d’mal-entente dans l’menage des Pain – un menage si uni d’habitude: un menage qui soulait ètre cité en exemplye a tout l’vésiné dans l’temps que j’tais forgeux (Laizé n’aime pon se r’souv’né que j’fumes forgeurs: quand nou s’adounne a pâlé du temps passé, ou preféthe dithe que j’soulaîmes etre ‘ironmonger’ au Huthé) a la campanne et Séquestre d’la Chapelle auprès d’siez nous.

Mais au mains n’allez pas créthe que j’soummes tréjous a avé des “fall out” coumme le sien d’l’aut’ sé. Pour dé mé, j’sis quazi trejous doux coum un agné qui suppe d’la creme suchrée dans eunne tasse en porcelaine sus un couossin de v’lous. Seul’ment! Y’a des fais qu’nou n’peut sinon faithe tchiq’ r’merques.

Et ch’est tant tchi j’ai l’y couert de pouothét saupoudré d’camphre.

Ch’est raport a not’ fille, coumme j’vos ai dit, que j’sis coumme tchi dithait en margalo.

Faut vos dithe qui s’en va y’avé un Bazaar ch’t’hivé pour eunne bonne oeuvre tchiq’bord. Coumme nou d’vait s’y attendre, Laizé en est, et coumme toutes les methes qu’ont eunne fille a mathié, la sienne en est étou. Laizé passé toutes ses séthées, chès drin, a faithe des djodrins et a couotre d’la dentelle sus tchiq’chose que nou muche si tchiq’un entre, et Lonore pâle tout l’temps d’eunne competition pour tchi qu’oul a mins san nom bas. All right! jusque la. J’n’objecte pas ès Bazaars pour les femmes! V’la tchi les tient otchupés et l’s’empèchent de pensé a ma. Mais tout d’mème; si vos arrivait ch’qui s’passi siez nous, l’aut’ sé, j’pense qu’ou f’thaites ch’qué j’fit: ou vos marrithaites étou.

L’aut’ sé, don, quand j’ramonti a haut après avé passé la sethée a aidji au Bos a desmélé les sous francais (achteu qu’nou lus fait grise mine) dans deus-très cabots d’cappeurs qu’j’avaimes souos l’conteux – quand j’ramonti siez nous, j’disais, j’entends tout plien d’rithie, d’caq’tethie, et d’coups d’marté dans la tchuizinne. Hello! man doux! qué j’me fis: tchi djantre qué y’a en allant? J’ouvre la porte! je r’garde! Tchès qué j’vé? Laizé assise dans man fauteuil (l’sien stoffé d’crin – du crin qu’j’avais souvé tandi que j’forgais au Huthé) a faithe des djodrins sus des gambes en blianc coton, et Lonore et Samuel (Samuel d’la Chronique, qui prend pension avec nous et qui n’paie pon bin rédjullyi) début atouore de la tabye. Ou ne d’vin’naites jommais tchès qu’chés pamphéques la ‘taient a faithe? Lonore avait mins sans nom bas, au Bazaar, pour ch’ys appelent eunne “nail driving” competition, et ils ‘taient touos les deux a pratitchi sus la tabye de sap sus tchi j’mangeons nos r’pas! Sus la tabye y’avait yun d’mes chabots plien d’cliou Sam et Lonore avaient en main chatchun un marté; et y’avait deja pus d’trés chents clious enfoncés partout sus ma bouonne tabye de sap que ach’teu autant vaut dithe ruinée!

Du coup, j’ronblyi qu’j’avais un caractethe d’anét: j’me marri tout rouoge! J’envyi un raide bouon coup d’pi dans l’fond des braies a Samuel, j’fliantchi eunne cliamuse par la fache a Lonore, et j’me mins a rouablié Laizé pour avé laissi ches aviers la g’dachi man meubye. Sam print sa pathe, en cliopinant, avaux les d’grès Lonore s’en fut plieuthant dithe ses priéthes dans sa chambre – et j’continuimes la conversation, ma femme et mé.

Et ch’est d’pis ch’la qu’jai l’yi couer de pouothet saupoudré d’camphre.

Piteur Pain
Morning News 4/10/1912