Né v’chîn l’texte d’aniet d’not’ auteu du mais, Joan Tapley:

Here’s today’s text by our author of the month, Joan Tapley:

Les vaques à Philo donnent du lait –
Hardi bouon pour té et mé,
Jeanneton va dans l’clios les traithe
Et lus donne de ieau à baithe.

Jeanneton s’met à traithe lé boeu –
Eune chose qu’ou n’éthait pas deu!
I’ beulit et i’ la boutit,
Et ou s’en fut piaillant siez yi.

“Achocre!” l’y dit lé Philo
“Fallait l’y bailli un coup d’maillot!
Janmais d’ma vie j’n’ai ouï dité –
Va-t-en dans l’clios ramasser l’lait!!”

L’achocre rêponnit: “Ch’est tout bein –
Personne né m’disent janmais rein!
Comment dithe la différence, P’pée?”
“Mais – par la melle tch’il a au nez!!!”