Eune articl’ye dé George d’La Forge tchi raconte des nouvelles d’1981:

A George F. Le Feuvre article covering news items from 1981:

Trenton,
Michigan, USA
Lé 8 d’août, 1981

Moussieu l’Rédacteu,

N’Pongo pathaît pensive dans san portrait tch’est dans la gâzette dé Jèrri du deux d’juilet tchi veint d’arriver ichîn. I’ d’vait faithe fraid en Jèrri au c’menchement d’juilet, car N’Pongo a sa grand’ câsaque dé pé. La drôle dé chose est qu’iun d’mes fréthes est d’opinnion qué j’lî r’sembl’ye, à N’Pongo! Ouaithe qué j’sai bein qu’ch’est pour m’êtibotchi tch’i’ fait la minne dé craithe tch’i’ y’a d’la r’sembliance, chose assez r’mèrquabl’ye est qué châque fais qu’j’ai visité un zoo j’ai ‘té fascinné par les marmoûsets et j’ai tréjous pâssé du temps à l’s obsèrver faithe lus marmoûsell’lies et sauticott’ties dans lus cages. Mais j’ai r’mèrtchi qué N’Pongo pathaîssait trantchil’ye et pensive quand j’la vis en Jèrri y’a un coupl’ye d’année. V’là tchi m’ramémouaithe lé vièr diton Jèrriais qué nou n’apprend pon à un vièr marmoûset à faithe des grîngnes. Chose assez êtrange est qué quand j’sis à les r’garder, les marmoûsets, i’ pathaîssent êt’ hardi întérêssis en mé étout. Éthaient-i’ par chance ouï pâler d’Charles Darwin?

#GeraldDurrell with N’pongo, the very first gorilla at #JerseyZoo (now #DurrellWildlifePark). This was taken in 1959! pic.twitter.com/6q91RpGy5u

— Durrell Wildlife (@DurrellWildlife) July 8, 2014