Né v’chîn la poésie d’aniet, tch’appathaît ichîn pouor la preunmié fais, d’not’ auteu du mais, Geraint Jennings:

Here’s today’s previously unpublished poem by our author of the month, Geraint Jennings:

Chouaîsi la Danme dé Tchoeu, pitchi un six;
nou fait san jeu s’nou n’en est pon tritchi;
nou gângne la gamme, ou l’pus souvent nou l’pèrd –
à mêconnaître les règl’yes, à dgi l’adèrt.

Nou-s’avanche ofûche amont eune êtchelle –
dé bein à haut la veue est hardi belle;
épis la tchilieuvre fait r’drisser ava;
nou fait san jeu, si ch’est pouor l’bein ou l’ma.

Nou r’touônne eune carte – ché s’sait-i’ trêfl’ye ou tchoeu?
La reue d’la malforteune touônne pouor l’malheu
et, si, un jour, nou s’adonne haut jutchi,
à la renvèrque nou-s’en d’vale êpliutchi.

Jouant dans eune êtchipe, ou à san tout seu,
nou-s’est gamme pouor gângni l’prix d’grande valeu;
mais y’en a des preunmièrs tchi s’sont les dreins,
et chein tchi sembl’ye valer, n’vaudra d’aut’ rein.