Né v’chîn la poésie d’aniet, tch’appathaît ichîn pouor la preunmié fais, d’not’ auteu du mais, Geraint Jennings:

Here’s today’s previously unpublished poem by our author of the month, Geraint Jennings:

Des rotchièrs et gliaichons fliantchis l’tou du solé
veinnent russ’ler à l’êlîngue dans d’s orbites hortes d’êtchèrre;
des p’tits mondes par mouochieaux, mondes amouoch’lés et g’lés –
sans vèrduthe, sans saîsons – bein difféthents d’la Tèrre.

Not’ plianète et ches’-là sont des jeunmelles solaithes
nées dans eune bielle d’êtaile, ensembl’ye înséminnées
par la s’menche du ponsi êtrueûlé dans la néthe
êtendue d’l’Unnivèrs. Lé ciel dêpêtrinné

nouôrrit les nouvieaux-nés atout la lueu d’êtailes.
Des d’gouts d’lait êclyichi lé travèrs d’sa néthe votte:
des conmètes et des leunes auve toutes lus âtivelles
au grand sounneux des sphéthes y piétinnent et dgéthotent.

Mais quand j’avons lanchi nos fîsées et machinnes
ès gliaichons et rotchièrs – d’la dans’sie…? N’y’a dgéthe sinne.