Né v’chîn l’texte d’aniet d’not’ auteu du mais, Henry Luce Manuel:

Here’s today’s text by our author of the month, Henry Luce Manuel:

Louèm’ qui veins de te briser
Ov’ fracas sus le roquier,
I’ m’a parut q’tu pâlais,
A l’instant que tu t’cassais:
Echo triste, i’ m’a semblié,
Mots qui suiv’ a murmuré:
“Fill’ de la FORCHE j’étais;
L’AUDACE est l’nom que j’portais:
– Mais v’chin
Ma fin! – “

Ros’ que l’vent – rude et grossier, –
Veint en passant d’abîmer,
I’ m’a paru tu plieurais, –
Tes bell’s fiell’s tu lamentais: –
Sangliot quasi étouffé
Tes dreins mots m’a apporté:
” GRACE est l’nom ma mère avait,
BIAUTÉ l’chain que nou’ m’dounnait:
– Ah! v’chin
Ma fin!”

Nai qui veins de t’en aller,
Que la plie est v’nue gâter, –
N’as tu pas, coumm’ tu tuônais
En pité, – ou te fondais, –
En voix lerment’ prononcé
Le saint nom un’ fais porté:
” Mèr’ PURETÉ à ma naissance
M’avait nommé – INNOCENCE;
– En v’chin
La fin!”

Arb’ – vert – sain – grand et fruitier –
Qu’orag’ veint de foudroyer, –
Coumm’ sus terr’ tu te cuochais,
Et, tronc cassé, te muorais, –
Soupirant, i’ m’a semblié,
Tes derniers mots ont été:
” L’ESPERANCE m’enfantit,
Le nom de VIE ou’ m’dounnit
– Et, – v’chin
Sa fin!”