Né v’chîn l’texte d’aniet d’not’ auteu du mais, Henry Luce Manuel:

Here’s today’s text by our author of the month, Henry Luce Manuel:

Un’ fais de grog,
Un’ fais de grog,
Ah! que chla fait du bein!
Sans san noggin,
Sans san noggin,
Bah! nou n’est buon pour rein!

Chaqu’ jour, la premièr’ chos’ que j’fais,
A ma bouteill’ de grog je vais;
Et les vaisins m’entend’nt chanté
Longtemps devant lius dêjuné:
Un’ fais de grog,
Un’ fais de grog,
Ah! que chla fait du bein!
Sans san noggin,
Sans san noggin,
Bah! nou n’est buon pour rein!

Dans mon café, au dêjuné,
J’en mets un’ goutt’ pour en r’lévé
Le goût qui autrement s’rait fade
Et pouôrait m’mett’ o-fûs-ch’ malade.
Un’ fais de grog,
Un’ fais de grog,
Ah! que chla fait du bein!
Sans san noggin,
Sans san noggin,
Bah! nou n’est buon pour rein!

Un coup ou deux dévant mié-jeu,
Je bé, pour me dounné du queu,
Et pis, pour bein fini l’dîné,
J’arrous’ d’un gouttin mon gôsi.
Un’ fais de grog,
Un’ fais de grog,
Ah! que chla fait du bein!
Sans san noggin,
Sans san noggin,
Bah! nou n’est buon pour rein!

Dans la r’levais i’ faut bein baire –
Sans chla l’travas ne sérait s’faire,
Ainchin chaq’ heur’ je lèv’ le coute,
Chaq’ heur’ je sup’ un’ tou’ p’tit’ goutte.
Un’ fais de grog,
Un’ fais de grog,
Ah! que chla fait du bein!
Sans san noggin,
Sans san noggin,
Bah! nou n’est buon pour rein!

Mais chest l’sair que j’sis dans ma glouaire,
V’lo l’temps, valets! qui faut m’vais baire!
Ha! la! ch’est donc, dam! que je jouis!
Je n’vé qu’étell’s! J’nai pus d’soucis!
Un’ fais de grog,
Un’ fais de grog,
Ah! que chla fait du bein!
Sans san noggin,
Sans san noggin,
Bah! nou n’est buon pour rein!

Pus tard – quand j’arriv’ prés d’mon liet-
(Et y r’ai prins un p’tit filet)
O coumm’ je ris – quand la marmaille
Capuche en d’hors – houpadde et braille
“Vier, tuès caud d’bèthe,
Vier, tuès caud d’bèthe,
Qui’ pil’ tuan as a’ nien!
O! coumme i’ craule,
Hi! coumme i’ craule.” –
“Coumme i’ craul’ra demain!”

Quiq’ fais tou’ d’mêm’, pus tard ma hueule
Me fait si ma’ – diantr’ – que j’en gueule.
Mais j’ny tiens pas, car chla s’pass’ vite,
Je m’r’ affraichis et chant’ tou’ d’suite:
On’ fais de grog,
On’ fais de grog,
Ah! que chla fait du bein!
Sans san noggin,
Sans san noggin,
Bah! nou n’est buon pour rien!

Des gens qui voudraient m’éffrité
Dis’nt qu’à grands pas je sis à m’tué.
Ech’ vrai? J’en trembl’-Je n’peux, hélas!
Changi à-ch-t-heur’,…qu’chla sait ou pas…
O donc du grog,
O donc du grog,
Qui m’fèche ou pas du bein!
Sans mon noggin,
Sans mon noggin,
Je n’sis pus buon pour rein.