1923: Caroline Trachy et les femmes dans la politique (et un cat dans un pits)
1923: Women in politics (and a cat in a well)

Couomme bé d’autres, j’ai ieu une suée d’fraid et n’v’la pourtchi que j’vos ai pon écrit la s’maine passée. Faut craithe que chest dans la Cohue que j’attrappi chutte suée car l’George Vardon est une raide buan stocker et viyant qu’il a tout pliein d’cherbon chest à bouctées qu’il en met pour cauffer la salle d’audience, couomme les gens d’intelligence appellent la Cohue. Vèr, j’y alli pouor ouïr la cause à la cousine Trachy et quant l’affaithe fut jugie, j’ouï un grand homme s’faithe: N’v’la qu’est bien jugi car j’avons bien assez de vieilles buannes femmes dans l’s Etats! Tchès qui voulait dithe par dithèt r’merques?

* * *

J’sais bein que v’la qui est un miot tard mais j’crais tout même que n’v’la qui intéressera les siens d’la paraisse au Maître des Près.

Savous pourtchi que John Bull du Boulevard n’alli pon au poll l’jour de l’élection? D’mandez à Liza qui l’enfrumi pour n’pon qu’il attrappe une suée d’fraid, à chein que j’pense.

Ah! Ma pathole, jamais d’autre j’n’irai cherchi des vouaies pouor étre insulté couomme j’l’avons été mé et Helier. J’fumes sièz ieun des pus vis d’la paraisse qui nous en prèchi et du clié et d’l’epais! Nous alli éttout sièz l’buanhomme Bill et ma pathole vous parlais d’être insulté et par des gens qu’ont déja un pid dans la tombe! A ma pathole jamais pu dithèt job pour mé ent encouore j’criyais que j’tions huit voix l’avant mais j’fumes trahis.

L’homme l’pus Auguste d’la paraisse s’en vint pour voter et bèthe une fais a la santé d’san candidat, bé seur. Y rencontri ieun de ses amins qui ly d’mandi s’il avait été au poll. Il ly réponnit que nennin car il attendait pour sa Missis. Et iou qu’est ta Missis, s’fit l’amin et l’autre de r’pondre: oulle est horte en ville et j’l’attends par l’train. Monte dans chu taxi et va cherchi What oh! Mais d’vant y faut que j’prenne deux ptits d’goûts et tandis qu’il tait à se rafraichir un miot l’autre alli raconté l’affaithe à Bertie qui prins son motor et alli cherchi la Missis pour l’amener au poll.

Notre homme s’en vint tout seu et quand Dolphus l’y d’mandi où était sa Missis, il l’y réponnit qu’il tait bein surprins qu’oulle n’tait pon v’nue par le train puis y s’n’alli be vite au ‘poll,’ et tchi surprinse en viyant la Missis qui v’nait d’voter pouor seur d’l’autre bord. Ch’est que l’buanhomme d’vint fort mârri!

* * *

Counaissez-vous Lilian? Ch’est une femme couomme il y en a pas pon beaucoup en Jerri car oulle porte des braies couomme un homme quant oulle va à la chasse… avec s’n’arme, bé seur, et quant oulle n’porte pon d’braies coumme un homme oulle cherche tréjous à mettre ses mains dans les pouchettes qu’il n’y a pon dans l’s habillements des femmes!

Ch’est dans la paraisse au boss qu’est tréjous un miot pâlot d’sa sorte mais tréjous en bouanne santé, qu’oulle réside et chest qu’oulle s’otchupe des affaithes d’paraisse. Si nous allouait ès femmes d’être de l’assembliaie des Etats, j’sis quâsiment seur qu’oulle se porterait candidat pour èsprouver à bouler hors l’sien d’El Hassa.

Il y a tchiques semaines ieut une assembliaie des électeurs de chutte paraisse, et Lilian était là. Oprès l’meeting, selon la buanne et vieille couotume nous offri des rafraîchissements. Lilian était là et si l’boss s’fait qu’il n’en a pas ieu d’bien, yi en ieut pour elle, car chutte liqueur de Chateaubriand était d’tchi d’buan et pour seur d’thi â trais étoiles. Nous l’y offri èttout de buannes cigarettes qu’oulle s’mint à fumer touot en d’visant sur sa vieille pipe. Oulle d’visit en angliais et lus raconti chutte histouèthe en piace d’lus bailler uns chanson.

La préchaine fais qu’il y aura une bordée d’même, il faudra que l’boss acathe de tchi meilleur que des Crystal pour offrir à Lilian.

Quant à mé j’souhaite longue vie et jouaie à Lilian et j’espèthe qu’oulle ira à bé d’autres meetings de chu genre iou qu’nous s’ra bein aise de la vèr.

* * *

Chunnechin est une affaithe de cat et la pure, pleine et entièthe vérithèt, fouai de Marie Hibou.

N’v’la qui s’passi dans la vallée de la paraisse au Captain iou qui s’en va y aver élection pour la poste de chantgni.

L’Dimanche au matin, un homme s’n’alli pouor cherchi d’l’iau pour faithe l’thée et quand y fut près du puits y prins l’boutchet ammarré à un miot d’filin. Y fut touot surprins d’entendre un cat miauler. Y l’vi les plianches et aperchu l’cat de siez ly jutchi sus un morciau d’bouais du couvercle qui était tombé dans l’puits!

Y descendi, son boutchèt, pensant que l’cat s’n’aller sauter dedans et qu’il pouorrait le r’haler à haut mais l’boustre de cat n’voulit pon de chunna. Enfin, notre homme, oprès s’être gratté la tête pouor saver tchi faithe, alli cherchi une ètchèlle qu’il mint dans l’puits et oprès un p’tit temps l’cat ramonti l’ètchèlle couomme si chunna avait été des d’grès!

Chunna est la pure pleine et entièthe vérithèt.

Caouain

10/2/1923