Eune articl’ye dé Douard L’Bro d’1957:
An article by Edward Le Brocq from 1957:

Au Portinfé,
Jeudi au sé.

Moussieu l’Editeu,

Ch’est mé, Merrienne, tch’y vos êcrit agniet, car le Ph’lip ne s’trouve pas trop bein, et m’a d’mandé de l’rempliéchi pour une fais. Si, à l’âge tch’il a, il n’mangeait pas tant d’viande et d’patates, y s’sait chent fais mûs, mais il est si têtoigne, man bouonhomme, que nou n’gâgne rain d’l’y pâslé.

Ach’teu, Moussieu, y faut que j’vos diche que pour bein d’s’années j’avons fait une règl’ye, l’y et mé, d’n’avé pas d’brit dans l’couothant d’la S’maine Sainte, et j’y t’nons ocquo.

Quand l’Ph’lip m’irrite, une mauvais habitude tch’il a, car prèsque tréjous y l’fait d’expès, pour me faithe mârri et m’touône de bord et n’dis rain, et y faut que j’diche étout que quand l’Ph’lip entre et trouve que l’dîné n’est pas prêt, y s’assiéd trantchillement sans murmuthé. Et, Moussieu, comme j’ai raison de l’savé, ch’n’est pas là s’n’habitude. Et don, pour une semaine ou d’même, ch’est la paix et la trantchillité siez-nous.

Ch’t’arlevée, Ph’lip a print une frouque et a défouï trais ou quatre vignes dans la bordeuse pour notre dîné d’main, et, ma fé, Moussieu, chein tch’y m’apportit dans la tchuîsine tait bein pûs bé que j’n’éthais creu possiblye. Y’a don toute appathence d’une bouonne récolte dans une djaizaine de jours. Il éthait voulu arrêté jusqu’à d’main-au-matin mais j’m’oppôsit tout d’suite, l’y disant qu’un bouon Chrêtien n’fait jamais chu travas-là le Vendredi Saint.

Il est vrai, Moussieu, come y dit, que la piûpart des gens au jour d’agniet s’trouvent libres de faithe bein des choses que lûs achêtres, même lûs péthes et lûs méthes éthaient considéthé un péché, et l’s’Etats montrent un bein mauvais exemplye quand y siégent dans la S’maine Sainte. Nou n’viyait jamais chonna dans l’temps d’Moussieu Vernon, et pourtant y’en avait tch’y dîsaient tch’y n’criyait à rain. Si chonna continue nou vêrra bétôt d’s’Etats au Dîmanche. Sûs bein des sens, Moussieu, j’n’amendons pas.

Pâslant d’s’Etats, j’veins de d’mandé au Ph’lip tchèsqu’y crait, ach’teu qu’la séssion est finie de chein tch’ils ont fait d’pîs l’premié jour.

“Eh bein, Merrienne,” y m’a dit, “pour te dithe le vrai, j’n’en crais pas grand’chose. Dans tout m’n’expéthience j’n’ai jamais veu si p’tit d’fait en tant d’mots. J’n’ai janmais veu tant d’temps pèrdu; j’n’ai janmais veu tant d’longs discours tchi n’avaient ni bouon sens ni raison. Et je n’s’y pas êtonné d’entendre que chinq ou six des membres sont tréjous siez les docteurs pour lûs maux-d’gorge, car ch’est tréjous yeux tch’aiment tant l’son d’lûs vouaix que les v’là tout-d’suite sûs lûs pids, quand autchun sujét veint d’vant la Chambre.”

“Ch’est vrai assez,” j’y’ai dit, “mais n’oublie pas que y’en a une bouonne deux douzaine et même pûs tch’y n’disent mot, et la piûpart ch’est des campagnards.”

“Ch’a tréjous tait d’même,” y m’a dit, “et dans les viers temps ch’tait une bouonne chose, car le seul mot tch’y connaissent ch’tait l’mot ‘Contre,’ mais d’nos jours, malheutheusement, hardi d’yeux l’ont oublié, et préfèthent le mot ‘Pour.’ Ch’est pour chonna que y’a tant d’folies et tant d’dêpenses. N’y’a pas longtemps, un vier amin, à-bein-près de m’n âge, me dit que toutes les bêtises tchi sont faites agniet, et tout l’ma, sont causés par des membres qu’ont la langue trop bein pendue, et il avait raison, enfin, ma fille, n’y’a rain à faithe ach’teu, mais d’vant bein longtemps, j’éthons d’s’êléctions, et nou pouôrrait vais des changements.”

“Chein qu’nou vêrra,” ou dit, “che s’sa d’hommes tch’y f’thont toutes sortes d’promêsses, mais une fais êlus, y ne s’sont pas longtemps d’vant l’s oublié. Ach’teu, Ph’lip, il est temps d’allé s’couochi, et de r’souv’nin, en nos rêvillant que ch’est Vendrédi Saint.”

Ph’lip
20/4/1957