Ch’est la Journée d’la Poésie. Lé thème ch’t’ année est: “Dé l’ieau, dé l’ieau, à touos les bords”

It’s National Poetry Day: ‘Water’ is the subject of this year’s National Poetry Day, Thursday 3 October, inspired by Coleridge’s mariner’s famous cry: “Water, water, everywhere”

J’tais au Pliat Dou aniet pouor pâler dé la mé,
des mathées, des manchots, des vliques et des vlicots,
coumme lé bouôn mathinnyi en bait à la santé.
Il en a tchée d’la plyie, bein pus d’un p’tit sico,

et j’dis ès mousses d’achteu: not’ mé, ch’est l’héthitage:
la mé boule dans l’artéthe dé tout bouôn p’tit Jèrriais;
la mé monte à not’ tête; not’ tchoeu bat l’pliein d’vâthage;
et l’dou pliat et paisibl’ye vaut not’ pus grand boulais.

Oh ieau ieauseuse et sainte, veins m’êvâtchi acouo!
Jé fliott’tais dans tes bras, tes saûtchets atchilyants.
J’èrvèrrai dans tes louêmes des naïades n’yées ès fliots,
des pétales arouôs’rêsses, des roses dé l’ochéan.

Et quand l’ieau m’êvâqu’tha, j’s’sai lavé avaû l’dou:
doux et mucre coumme du chucre; radouochi d’amièrdoux.

Bliodgi d’vant:

• La Journée d’la Poésie – National Poetry Day
• La Journée d’la Poésie – Poetry Day
• La Journée d’la Poésie – National Poetry Day
• Eune poésie en êtaile – Star poem