Sus l’site du Conseil Britannique-Irlandais:
On the British-Irish Council website:

Les langues d’ichîn, minnoritaithes et mains faites sèrvi

Lé Gouvèrnément Gallouais mène l’activité dans l’CBI entouor les langues d’ichîn, minnoritaithes et mains faites sèrvi.

Les Adminnistrâtions Înscrites du Conseil Britannique-Irlandais lus vantent d’un riche héthitage lîndgistique tch’est un êlément împortant d’la tchultuthe dé ches îles. D’sithant souôt’nîn les langues d’ichîn, minnoritaithes et mains faites sèrvi (LIMs) chu sujet fut ajouôté à la cliôsée d’travâl’lies du CBI à la traîsième haute rêunnion au mais d’Juîn 2002.

La travâl’lie s’en d’mente des LIMs siévantes: l’Irlandais, l’Gallouais, lé Scots, lé Scots d’Ulstèr, lé Manx, lé Jèrriais, l’Dgèrnésiais et l’Cornouaillais

La travâl’lie aîgue à identifier et chârer la miyeu pratique lé travèrs des adminnistrâtions înscrites et dans des c’meunautés d’LIMs. La travâl’lie s’întérêsse sustout dans les grandes cliôsées d’la transmission d’la langue, des stratégies dans les c’meunautés, l’usage des LIMs par les jannes gens, d’l’êtrueûl’lie, et du r’êffet êcononmique des LIMs, la markét’tie des LIMs, les LIMs et la TCI, l’êcalopp’thie d’la législâtion pouor protégi et encouothagi les LIMs, et l’êducâtion par l’mouoyen des LIMs.

La travâl’lie s’rassembl’ye rédguliéthement, et chenna au nivé Minnistéthiel étout, et organnîse des distchut’ties touos l’s ans pouor les dîtheurs d’politique et faîtheurs à seule fîn d’avanchi la châr’rie d’bouonne pratique entré les cheins tchi travâlent dans la cliôsée d’LIMs. Châque distchut’tie s’en d’mente d’eune difféthente cliôsée du travas d’la travâl’lie. Eune distchut’tie prînt pliaiche au mais d’Novembre 2012 tchi s’en d’mentit d’la promotion des LIMs par l’mouoyen d’l’ensîngnage des preunmiéthes années. L’s accontes dé chutte distchut’tie s’sont d’propos à eune Rêunnion Minnistéthielle à prendre pliaiche duthant la s’gonde maîntchi d’2014.