En r’vénant d’Granville

Enfliubé dans la nièrcheu sus la mé, lé viède
attrioque lé baté pouor sa caûchie. Dans la coque,
êcoquevilyi, vilyant coumme des fliaûmêques d’êcrèdes
ès haûs nouent faûfilées d’La Corbiéthe à La Rocque,

j’aheuqu’te, happé dans un nièr drannet grée d’affits.
Les paîssons d’néthe mémouaithe sont hoûtchis sus les cros
des criques et cottes tchi haûtent ès haûteurs dé Jèrri.
Bèrchi sus les louêmes, j’aboule à bord du bèrquot

eune bat’lée d’êtînchelles pouor viédgi à la gliaine
l’affilée d’rêvach’rêsses. Vressantes et ravêtchies,
ches leunmiéthes chôl’yent et chaûmêquent; la mé en est plieinne
et m’empl’ye atout des paîmées d’ses êcrèdes pêtchies.

2012