Acouo un but d’Alice:
Ou ‘tait don à décider (du mus qu’ou pouvait car l’arsion l’accabâssait d’sommé et d’lourdéthie) si l’ji d’graie un colyi d’mèrgots valait bein la peine dé sé l’ver pouor tchilyi les mèrgots, quand d’un co né v’là un Blianc Lapîn ès roses ièrs couothit tout près d’lyi.
V’là tchi n’tait pon divèrsément r’mèrquabl’ye; et Alice né criyait pon qué ch’tait hors du c’meun d’ouï l’Lapîn tchi s’dit, “Mouôn Doue! Mouôn Doue! Jé s’sai en r’tard!”
(Quand, pus tard, oulle y r’pensit, v’là tchi s’adonnit qu’oulle éthait deu l’èrmèrtchi, mais pouor achteu v’là tchi sembliait entout ordinnaithe); mais quand l’Lapîn halit eune hôlouoge dé d’dans la pouchette dé san gilet et l’èrgardit, d’vant s’trînmousser, Alice sé butit d’un embron, car ou réalîsit d’siette qu’ou n’avait janmais veu un lapîn d’vant auve eune pouchette dé gilet, ni pouor autant dithe, eune hôlouoge pouor en haler, et tchuthieuse coumme un nouvieau prêtre, ou couothit souotre li l’travèrs du clios, et heutheusement oulle arrivit en temps pouor l’vaie d’valer avaû un grand tèrryi souos la banque.D’siette la v’là Alice tchi d’valit souotre li, sans entout penser coumme tchi dgiâtre s’en r’dêhaler.