L’s Australiens ont lus fête nâtionale lé vîngt-six d’Janvyi – et pouor ieux ch’est l’mitan d’l’Êté. Lé Jour d’l’Australie mèrque la date quand la colonnie d’la Nouvelle Galles du Sud fut fondée, v’là tch’est considéthé coumme lé preunmié pas sus lé c’mîn d’la bâtithie d’eune nouvelle nâtion.
L’Australie est fanmeuse pour ses bêtes marsupiales, et nou vait l’kangorou et d’aut’ “marsupieaux” du mème ordre dans les coins zoologiques. L’ours “Koala” est un tchuthieux p’tit ours, pas pus grand qu’un gros cat, est i’ r’sembl’ye à eune grôsse balle dé laine. I’ grîmpe les bouais et lus assiévent sus eune branque à vouos r’garder atout lus p’tits nièrs ièrs.
J’trouvons l’temps divèrsément caud ichîn en Australie. Ouaithe qué ché s’sait l’mais d’Dézembre, j’sommes en pliein êté, les trais mais d’Dézembre, Janvyi et Févri étant l’êté Australien. La tempéthatuthe monte à pus d’nénante dégrès touos les jours. Souvent oulle appraiche dé chent. Y’a des moûques et des moustiques. Les moûques èrsembl’yent ès cheinnes dé Jèrri, mais i’ sont pus agressives! I’ vouos sièvent dans les rues et nou n’peut pon les cachi, mais i’ n’sont pas si piéthes dans les villes.Dans l’hôtel où’est qué j’couoche, y’a un drannet d’tulle lé tou d’man liet pour empêchi les moustiques dé souper à mes dêpens la niet! Heûtheusement, la fièvre “paludéenne” n’est pon par les c’mîns dans la contrée et l’seul ma qué l’moustique peut vouos faithe est la vengeance dé san pitchet!
Ch’est p’t-êt’la chaleu tchi fait l’s Australiens baithe d’la biéthe. Janmais d’ma vie j’n’en avais veu tant d’goudalée! L’s aubèrges sont ouvèrtes à cèrtaines heuthes du jour. L’arlévée, ch’est dé chînq à six. À ch’t’heuthe-là i’ sont tréjous plieines dé gens tch’ont eune sé încriyabl’ye!
Eune habitude des Australiens tchi n’mé dêpliait pon est d’mangi d’la viande pour dêjeuner. J’ fus la preunnié matinnée à l’hôtel quand la sèrvante mé d’mandit si j’voulais un “beef steak” ou d’s oeufs et du jambon à man dêjeuner, mais j’m’accouôteunmis bein vite à mangi la viande, et j’n’en ai janmais mangi d’miyeuthe! Un aut’ dêjeuner tch’est populaithe en Australie est un fricot d’faie d’brébis. À man goût, ch’est hardi bouan. Il est hardi comme lé faie d’lard.
Les zoologistes nos explyiqu’thaient sans doute qu’l’île-continnent fut s’pathé d’l’Asie y’a si longtemps qu’toute eune aut’ manniéthe dé bestchias avait êvolué là-bas. Ch’est en tchi y’a des mammiféthes ponn’rêsses, des platypus à becque dé cannard, et des marsupiaux auve des poutchettes pouor lus p’tchiots. Les kangarous saûticotent par-chîn et par-là l’travèrs du pays, et ch’est chance qu’il’ avaient êvolué seul’ment là-bas, car si nos vacottes Jèrriaises avaient êvolué d’même à r’bondi coumme sus d’l’êlastique nou n’éthaient janmais mênagi d’les traithe dans les clios!
Deux Mots des Exilés à L’Assembliée d’Jèrriais
Y’en a d’nous qu’étaient Saint Ouennais
Et d’autres, fièrs d’être Saint Martinnais,
Qu’en Australie ont ‘té pliantés
Ou à Tèrre Neuve sont arrivés.
“J’lî dis d’aller la montrer au cap’taine tchi lî donn’nait p’t-êt’ tchique rêcompense pour la faithe netti eune fais arrivée en Australie. Quand l’cap’taine vit la câsaque i’ lî dit: ‘J’ai un cliu tch’est la même couleu, à tchiquechose près, et j’m’en vais l’couôtre sus la taque, et pèrsonne,né pouorront s’en apèrchéver. Connaîssant l’couochonnage qué l’cap’taine appelait d’la couôtuthe, lé pouôrre Jean ‘tait au m’sespé et dît au cap’taine tch’i’ n’voulait pon lî donner ch’t. embarras-là, mais i’ n’y’avait rein à faithe pour empêchi l’captaine dé pratitchi sa couôtuthe. ‘Bah!’ i’ dît à Jean; un bouân cap’taine dait les naviguants dé s’n êtchipe. Ou-s-êt’ tous des bouâns garçons dans l’châté, et j’m’en vais rabilyi chenna dans dgiex minnutes et ta câsaque es’sa comme neuve!’
“Quand ou r’vînt au châté, sa câsaque, y’avait un cliu d’ssus qué nou pouvait vaie auve les ièrs freunmés! L’idée du cap’taine dé ‘tchique chose près’ ‘tait quâsi la difféthence entre nièr et blianc, et Jean éthait peu en plieuther quand i’ vit sa bouanne câsaque.
” ‘N’té gêne pon,’ j’lî dis. ‘I’ n’y’a qu’ à dêcouotre chu cliu-là et porter ta câsaque à netti quand jé s’sons à Sydney’. Comme les points ‘taient longs, ch’fut eune pétite affaithe dé dêcouotre lé cliu, mais, hélas, lé cap’taine avait copé la taque houorte dévant couvri lé creux auve lé cliu, et né v’là l’affaithe piéthe qué janmais! ‘Eh bein, Jean’, j’lî dis, ‘la miyeu chose à faithe est dé tâchi d’trouver un mio d’drap tch’est d’la même couleu d’tan fa quand j’ithons boutitchi à Sydney ou porter ta câsaque à tchique boutique tchi fait des r’pathâtions d’habits’. Mais Jean ‘tait înconsolabl’ye et finnit par touanner san bouân fa en habits d’travas.
Quand j’es’sai grand j’ithai én Australie,
Garder des mille et des mille brebis;
Et quand ma fortune j’éthai fait
Ch’est en Jérri que j’erveindrai.
En Australie!
George d’La Forge, JEP 1964
Nouos v’là arrivés à Fremantle, port prîncipa d’l’Australie Occidentale! Perth, la capitale dé l’Êtat, est à eune dgiêxaine dé milles pus haut et d’l’aut’ côté d’la riviéthe Swan, et ch’est par Fremantle qué san conmèrce trouve san c’mîn à la mé. ch’tait l’dgix d’dézembre, 1963, qu’j’avons mîns l’pid à tèrre en australie pour la preunmié fais!
Ch’tait en 1829 qué l’Cap’taine Fremantle, dans l’navithe Challenger, prîns possession d’la riviéthe Swan et r’cliâmit, au nom d’Sa Majesté Britannique, tout l’territouaithe dé La Nouvelle Hollande tchi n’tait pon dêjà partie d’La Nouvelle-Galles du Sud. Dans la même année, La Colonie dé la Riviéthe Swan fut fondée par lé Cap’taine Stirling. Lé Cap’taine avait examiné les lieux deux ans d’vant, et ch’tait sus sa r’quémendâtion qué l’Cap’taine Fremantle en avait prîns possession pour l’Angliétèrre.
Auprès un tas dé r’chèrches ès envithons d’la riviéthe, l’empliaichement d’Perth fut chouaîsi, et un an pus tard la population avait grandi à 1,300 personnes. i’ n’fûdrent quand-même pon sans peines et mînséthes. L’ennion, l’absence dé communication auve lé rest du monde et l’hostilité d’s Aborigènes les vengeait. Mais, en fîn d’compte, i’ mênagîdrent à surmonter lus peines, et y’avait 5,000 pèrsonnes êtabl’yies là en 1840. aujourd’aniet, la population d’l’Êtat d’l’Australie Occidentale est dé 755 mille. La dêcouvèrte d’or à Kalgoorlie en 1893 asseûthit la prospéthité d’l’Êtat.
En marchant dans les rues d’Fremantle, nou pouorrait s’craithe en Améthique si nou viyait pus d’gratte-ciels par les c’mîns, et j’trouvis qué ch’tait d’même dans toutes les grand’ villes d’Australie à m’suthe qué nou les visitait.
J’feunmes rein qu’un jour à Fremantle. À ch’t heu j’nouos trouvons dans la Grande Baie d’Australie, et la mé est pus rude qu’ou’ n’avait ‘té pour eune volée. Il a venté raide, et v’là tch’a fait les p’tits moutons sauticotter sus l’haut des louaîmes. Lé navithe né crôle pon quand-même pour dithe, mais i’ n’fait pon trop bé sus l’pont à cause du vent.
J’feunmes deux jours à crouaîsi la baie, et quand j’gangnînmes lé Dêtrait dé Bass la mé ‘tait pus calme. Vendrédi, l’treize dézembre, j’arrivînmes dans la cauchie d’Melbourne, capitale dé l’Êtat d’Victoria. Ouaithe qué l’fanmeux Cap’taine Cook vit la côte dé Victoria eune sémaine dévant s’embèrtchi à Botany Bay en 1770, souoxante-quatre ans lus passîdrent dévant qu’la contrée fûsse otchupée par des pionnièrs en assez grand nombres pour en faithe eune colonie, et acouo siex mais pus tard dévant qu’y eûsse ieune à Melbourne. Quarante-sept ans s’étaient dêjà passées dépis la fondâtion d’la ville dé Sydney, dans l’Êtat dé la Nouvelle-Galles du Sud. Un mousse nommé John Pascoe Fawkner avait fait partie des pionniers tch’avaient êprouvé – sans rêussite – à colonîser la côte souos lé Lieutenant-Coronel David Collins en 1803. Trente-deux and pus tard, i’ fut iun des fondateurs dé la ville dé Melbourne!
Pouôr’ moutons dé Jerriais,
Ou l’viyis bain qué trop,
La belle achie d’décrets
Qui vont tchais sus vot’ co :
Car bain des piéch’s dé vous
Qui tchitèz vot’ patrie,
Pour s’êcapé des loups,
Fillèz en Australie.