Eune histouaithe d’la fanmil’ye Pain dé 1914. Tchiques èrmèrques: patholes d’întéthêt – “paûtrînglyi“, “entrâles“, “motha“; la mention d’prostitution, et l’attitude des campangnards envèrs la Ville; lé Prînce de la Buche-brulée dévthait êt’ lé Prînce Blücher, T’nant d’Hèrme en 1914 tchi happit la pathe au c’menchement d’la Grande Dgèrre.

Here’s an interesting article by Philippe Le Sueur Mourant.

“J’m’ennyie, memmée, si tu savais coumme j’m’ennyie! J’n’ai pas ‘d’object in life’ coumme nou dit: j’voudrais d’l’otchupation: j’voudrais être utile a tchiq’un ou a tchiq’chose – a tchiq’un d’préféthance. J’ai coumme dit la chanson:

No one to love me, no one to bless;
No one to fondle me, none to caress.

et j’sis ennyée d’passé man temps a faithe tréjous la même chose, jour après jour! Se l’vé, grée a manji, r’pathé la vaisselle, grée a diné, r’pathé la vaisselle, grée l’tée, r’pathé la vaisselle, s’couochi, dormi, se r’lévé, et r’quémenchi, l’sempiternel rond.

Ch’n’est pas eunne vie, cheunna! ch’n’est pas pour ditét que j’ai té minze au monde.”

V’la ch’que m’dit Lonore, hier au sé, tandi qu’oul ‘tait assise endrét l’mitheux, et que j’tais a lis brinji ses corles et à la prépathé pour la niet. V’la tchi m’dounni un coup ichin. Ma fille, m’n’ésfant, chair de ma chair, qui fut mînse au monde par le docteu Brayn, et nossée par Missis Le Gréelé (djix shlings la s’maine, nouorie, et très verres de litcheu par jour rapport a ses crampes d’estouma) et bâtizée l’mème Dinmanche (ch’n’est pas par ordji que je l’dis; mais enfin l’cas est bin counnu) que Son Altesse le Prince de la Buche-brulée – j’mint cheunna bas dans l’temps – et entendre ditet d’vis d’eune èsfant qu’à ‘té èsl’vée sus les gnors d’eunne méthe pieuse (ch’est pas pour mé vanté, mais nou m’counnais) habilyie s’lon san rang (n’y’avait rin d’trop bon a la boutique du Carrefour Sélous) et èsdutchie coumme si ch’avait té la propre èsfant d’un Inspecteur des C’mins – liéthe, chiffré, la granméthe, l’piano, et du fancy work!

V’la ch’que ch’est d’être venus d’meuthé dans eunne ville ou-és que Satan est continuellement a rodé atouore des gens. Si Piteur voulait l’avoué, i’ pouorait dithe coumme ché n’fut qu’avec crainte et trembliément que je r’chu la nouvelle qui fallait nos n’allé d’meuthé en ville, au d’sus d’eunne imprimthie! Pense a l’avnin d’notr’ èsfant, que j’lis dis. Nos n’allé d’meuthé dans Sodome, que j’lis dis; parmi des scribes, pharisiens, hipocrites, et gens de mauvaise vie!

N’poué sorti s’proumné sans être exposés a marchi sus l’mème pavé qu’eunne fille de jouée – hélas! tchi nom a dounné a des brébis égarés! – et a s’buté a chaque pas contre des voleurs, des fripons, des diseuses de chance et toute la djingue qui suit la multitude pour mal faithe!

Mais rin n’y fit! Piteur se motchi d’mé, l’incredule! et nos y v’chin d’pis bétot très ans. Et l’fruit d’mes entralles s’ennyie! L’Bouan Djeu m’es tenmoin que j’n’ai rin néglyigi pour la faithe r’semblié a mé! J’l’ai sermounnée et prêchie d’pis sa pus temdre jeunesse! Ou sait l’Epitre a Timotée par tcheu: j’avons rarement mantchi d’chanté un cantique ensemblye dé vant que d’se couochi – deux l’Dinmanche et l’Vendredi Saint – et je n’counnais pas eunne fille qu’a assisté a pus d’moyens d’grasse que Lonore. Et oquo ou s’ennyie! ses ésprits son bas, et ou ruminne dans les carres!

Tchi faithe? “J’voudrais être nosse” qu’ou m’dit l’aut’ jour. “J’voudrais avé des p’tits êsfants a nossé, a potringuelyi, a catouoillyi, a joué avec – j’voudrais avé d’s’êsfants a mé même!” J’eut bien èsprouvé a l’y’éxpyitchi qu’pour avé d’s’êsfants a sé même, i’ faut preumiéth’ment avé té mathiée quasi un an, ou n’semblyi pas comprendre – v’ls tchès su innocent! – ou chantusait tout l’temps: “J’voudrais avé tchiq’chose ou tchiq’un a nossé sus mes gnors!”

J’en sus au mzespé! Fut un temps ou j’criais fliabliément qu’oul éthait yeu ses souhaits d’vant long: mais l’affaithe resti pendue ès cros! Dithe que chu pasteur la, en tchi j’avais tant confiance, a abusé d’nous pour quâzi un an: qu’il a manji d’mes mervelles pus vite que je n’pouais les faithe (au prix qu’etaient l’s’oeus, étout!) qui m’a souotithé j’n’ose dithe combin d’sous pour ses oeuvres; qu’les merques de san paraplyie mouollyi sont oquo visiblye sus man bouan tapis; et que… (! Mais, j’m’arrête: ch’n’est pas ma preumié fais a passé dans l’criblye du malin!

Tout ch’la et bin d’autes choses font qu’Lonore a l’s’esprits bin bas! Et pour ch’qu’en est de s’n’envie d’nossé tchiq’chose, Piteur est d’avis d’y’accaté eunne fourcée d’pouchins. Nou les mettrait dans la mansarde, dans des casses a savon ou ditét: Lonore s’abus’sait a lus èsfrinné d’la mie d’pain; et j’ithaimes lyi et mé, l’arlevée, lus ramassé du meurdron sus les fossés. Ch’est a savé si v’la lis r’mont’tait l’motha!

Laïzé Pain
Morning News 14/5/1914