En 1921 la gâzette Les Chroniques de Jersey fit eune mêprînse entouor lé changement d’l’heuthe. Lé Cahouain racontit l’affaithe.

In 1921 there was a newspaper mix-up about whether clocks should go forwards or back. The Owl was on it.

L’aut’e jour, quand l’Chef fit la béveuthe de r’quémander à nos lecteurs d’Avanchi lus eulouoges d’une heuthe, à la pliaiche de les r’tergi, i’y en eu des masses qui suivithent ses instructions sans la moindre réflection chein qui lus causi de bain sérieux inconvénients.

Ou viyiz, une gâzette comme ls nôtre a tréjous ‘té considéthée comme une autorité infailliblye sus toutes espèces de choses, et la pus grande partie de nos clients ne pens’saient jamais de tchestionner ou d’critichi autchuns commentaithes qu’i’ liaisent dans les “Nouvelles Locales.”

La colonne du Caouain sans doute, n’est jamais prinse sérieusement. Ch’est l’travas d’un triste ouaisé, pus ou mains désêtchilibré, qu’est raique tolethé sus l’personnel à cause de ses longs services et viyant qu’une certaine proportion de nos lecteurs tchit’taient à prendre “Les Chroniques” si ch’est qu’ils apprenaient que l’Caouain avait ‘té fliantchi à la porte.

Mais avec les “Nouvelles Locales” ch’est tout-à-fait diffethent.

Chu département-là est absolument la spécialité du Chef li-même et i’ n’y en a pas iun d’entre nous qu’os’sait même êprouver à y insérer le moindre p’tit paragraphe.

Il est don à supposer que tout chein qu’nous y lièt est tout ch’qui peut y aver de pus authêntique et correct, chein qu’explique pourtchi que nou ouait tant d’monde dithe, à l’appui d’un ardgûment, “Ch’est vrai, car je l’ai lu mé-même dans la gâzette!”

Ou pouvez don penser, quand not’e Boss se permins de dithe l’aut’e Samedi “Avanchiz vos eulouoges d’une heuthe dévant vos couochi demain au sé;” que nos bouannes gens en firent autant sans se d’mander pour un moment si che n’tait pas un erreur de la part du Chef.

Nou peut tchiquefais dans d’patheilles occôsions, mettre tout sus l’co du malheutheux typo. mais i’ n’y avait pas moyen d’faithe ch’la dans chu cas ichin, alors le Boss fut obligi d’admettre sa faute et i’ mins une espèce d’apologie dans un autre numétho mais il ‘tait trop tard, le minchet ‘tait fait.

Ch’tait l’pouore vier Cliément d’Caen qui fut iune des pièthes victimes.

I’ ramonti à s’couochi de vier mînièt et en passant sa vieille eulouoge à mié la montée, “Ah!” qu’i’ dit, “je m’en allais oublier! To-night’s the night!”

Et i’ vos touâni la grande adjule tout attouo du cadran.

L’enlouoge, lyi, qui n’y a oquo jamais mantchi pathole, sonni une heuthe, naturellement. et comme la vraie chose était d’la mettre à onze heuthes v’là tchi s’en allait li faithe une difféthence de deux heuthes le lendemain au mâtin.

Et tel en fut! Mait’e Cliém était par les c’mins deux heuthes devant ses vaisins. I’ fit l’ver Joseph Le Boutillyi san domestique, qui fut obligi de traithe les vaques à la veue d’la lanterne en faisant des juthements sus les grands messieux qui sont la cause qu’i’ faut continuellement êlourder l’s enlouoges comme chenna!

Quand Maît’e Cliém eut soigni sa jument, i’ rentri à la maison rêvillyi sa nièche qui li avait dit de li crier de bouanne heuthe car oulle avait du travas d’extra à faithe chu Dimanche-là, viyant que l’prédicateur était pour venin dîner à la sortie d’la chapelle.

Opprès dêjeuner le bouonhomme et Joseph minrent les bêtes dehors et en r’venant du clios Maîte Cliém. s’apèrchut que la chimenée à Laïesse Ernon ne fumait pas oquo et il en fit la r’merque à Joe. “Je gag’geais qu’i’ sont oquo tous au liet siez Mess Ernon, ils ont roublié à avanchi lus enlouoges!”

Quand l’eulouoge à Maît’e Cliém. sonni douze heuthes sa nièche fut li crier pour li dithe qu’il ‘tait grand temps d’aller s’changi pour être prêt à r’chever l’prédicateur.

“J’allons dîner à un quart de iune,” oulle li dit, “ch’est pourtchi va t’habillyi acheteu tandis que j’bliatchinne tes bottes, et pis tu pouorras aller l’rencontrer, v’là tchi pathaîtra mus. Et n’seyiz pas longtemps le dîner est quâsi prêt!”

À douze heuthes et d’mie (heuthe du chef) v’là Mess de Caen en route pour la chapelle comptant d’rencontrer le pasteur sus le c’mîn mais à sa grande surprinse tout l’monde allait dans la même direction et quand il appréchit et vit qu’les gens entraient dans la chapelle à la pliaiche d’en sorti i’ pensi qu’i’ y avait tchiquechose qui n’allait pas bain.

I’ resti mâté dans la route à êprouver d’rêsoudre l’problême quand ieun d’ses vaisin arrivi avec sa femme.

“Eh bain Maîte Cliém” se fit la missice, “ch’est un r’nouvé d’vos vaie à la chapelle au Dimanche matin! Allous v’nin vos assiéthe avec nous?”

“Ous appelez chennechin l’matin vous?” se fit l’bouonhomme, “savous bain qu’il est une heuthe de l’arlevée?”

Oh! mais Mess de Caen tch’est qu’ou dites? I’ n’est pas oquo onze heuthes. Ah! j’vai bain tch’est qu’ch’est. Ous oubliyîtes a r’tergi votre oulouage hier au sé!”

“La r’tergi? Gâs-déouelle! je l’avanchi d’une heuthe, comme il ‘tait dit sus la gâzette qu’i’ fallait faithe!

Extchusez mé i’ faut que je m’en r’aille siez nous, ma nièche s’en va être folle!”

Et, Maît’e Cliém ercouothi siez-li dithe à sa nièche qu’i’ y avait ieu une trompe de tchique bord et que l’prédicateur es’sait oquo deux heuthes devant que de v’nin dîner.

La pouore fille se mins à plieuther et dit qu’san dîner s’en allait être ruiné. Ou rabbatit l’feu et pis ou s’agenousllyi en d’vant d’san fou à verser du graîvin pardessus san morcé d’boeu.

Maît’e Cliém avait ‘té erdênichi la gâzette li, et était à r’liaithe la fameuse proclamation du Chef, mais sa nièche li airaichi l’papi des mains et li ordonni de s’mettre tout d’suite à r’péler un autre lot d’patates pour rempliaichi les siennes qu’étaient à sèchi dans l’fou.

Tout s’passit oquo pas mal, le prédicateur fut bain l’contraithe de ch’qu’i’ fallait avec s’n eulouoge et li explitchi la position bain cliaithement.

Malgré qu’i’ s’dêcliathi enchanté du r’pas qu’la niéche li avait servi, la d’mouaîselle est oquo mârrie et r’fuse de pâler au Chef.

Quant à Maît’e Cliém, i’ vint à la boutique faithe un traîn abominablye et nos dit qu’i’ s’verrait pendu devant que de r’prendre une seule autre gâzette.

J’ai grand peux mé, que j’allons perdre un grand nombre de nos clients à cause de chute job-là.

Caouain
Les Chroniques de Jersey 22/10/1921