Nou vait acouo un tou d'preinseu chîn' et là, mais i' sont pus à co d's ornéments d'gardîn ou pliantés d'flieurs. Aut'fais les fèrmes faîthaient du cidre à tare-larigo atout lus tou d'preinseu et preinseu même. Ach'teu la tradition d'la faîs'sie d'cidre attrioque des mouochieaux d'monde châque Stembre, quand nou veint à Hamptonne, lé mûsée d'la vie d'la campangne à Saint Louothains, à seule fîn d'vaie les pommes êtampées et jusées comme nou soulait l'faithe, d'aver du fanne atout des pommes (pouor les mousses), dé baithe du cidre (pouor les grandes pèrsonnes) et pouor renforchi lus amour pouor la tchultuthe Jèrriaise. Nou chante, nou danse, nou pâle, et nou r'cite d'la poésie en Jèrriais entouor les pommes et la baithie d'cidre. À vot' bouon amendement!