La Faîs'sie d’Nièr Beurre est eune fête annuelle tch'est organnisée par lé National Trust dé Jèrri à san office « Les Ormes » à Ste Mathie. Ou célébre eune vielle tradition Jèrriaise, tchi soulait s'arriver dans bein des fèrmes partout l'île à la fîn d'la récolte des pommes.

Pèrsonne né sait quand chutte tradition c'menchit exactement, mais duthant les dgiêx-septième et dgiêx-huitième siècl'yes, vîngt pouor-chent des clios 'taient couvris par des gardîns à pommes, à seule fîn d’faithe du cidre pouor payi les ouvriyis. Lé restant des pommes ‘tait fait sèrvi pouor graie l’nièr beurre. Traditionnellement, les famil'yes lus rassembliaient à la fèrme à seule fîn dé p'ler les pommes. 

Entre'chîn, deux’-trais gallons d'cidre ‘taient vèrsés dans un bachîn, épis i’ ‘taient mîns par-dessus l’ feu où'est' qu' i’ 'taient laissés à mitonner pouor toute la journée. Lé sé, il’ ajouôtaient les pommes et du chucre, des lîmons, du ricolisse et d's êpices étout. Epis, les volantaithes, châtchun à san tou, èrmuaient l’mêlange auve un rabot toute la niet et l’ lendemain jusqu'à ch' qué l’ mêlange fût prêt. Ch'tait eune veille împortante où’est qu’ les gens pouvaient chanter, danser et jouer la musique tandi qu'lé nièr beurre mitonnait lentement. 

En dêpit d'san nom, lé nièr beurre, auve san goût originnel, n'est pon du beurre, ch'est comme dé la g’lée, et un tas d’ gens l'mangent auve du pain ou du pain rôti.