À forche dé crier Noué, i' veint! La Fête dé Noué en Jèrri s'est êcallopée avaû les dreines années pouor faithe rêjoui les s'maines d'vant Noué: des veues, des pathades et un tas d'boutiqu'sie en Ville. Nou vait "Bouan Noué!" à touos les bords, et nou ouait la chant'ties d'cantiques dé Noué en Ville ou nou va au sèrvice dé cantiques dé Noué organnîsé par L'Assembliée d'Jèrriais. Comme dé raison Noué d'au jour d'aniet n'est pon l'Noué du temps pâssé quand nou-s'allait crier san Noué par les c'mîns, quand les campangnards griyaient lus marchandises à la Longue Veil'ye, et quand des gens fêtaient l'Vièr Noué l'six d'Janvyi - mais y'a acouo tchiques couôteunmes qué nou garde acouo ou tch'ont 'té ravigotés pouor en faithe un Noué bein Jèrriais!