La Fête Nouormande (Les Nouormands d’la Grand’ Terre disent Fête des Rouaisons) est eune célébrâtion d’la langue et d’la tchultuthe Nouormande. Ou prend pliaiche touos les ans, d’vièrs lé c’menchement d’l’Êté, en Jèrri, en Dgèrnésy ou dans la Grand’Terre (Nouormandie, France). Duthant trais jours, des Nouormands d’Jèrri, dé Dgèrnésy, dé Sèr, d’Aur’gny et d’la Grand’ Terre sé rêunissent pouor célébrer lus héthitage et lus identité.

Duthant chutte fête, i’ y’ a d’la musique, d’la chant’tie, d’la dans’sie, d’s èrcitâtions d’poésie, et d’la liéthie. Nou peut jouer étout à des gammes Nouormandes traditionnelles. Ch’est un tas d’fanne pouor toute la fanmil’ye!

La Fête Nouormande est eune occâsion pouor les Nouormands dé montrer lus pus bieaux habits d’fête, lus bieaux chapieaux et, pouor les femmes, dé montrer lus pus belles coêffes!

La dreine Fête Nouormande en Jèrri fut en Juîn 2017. Ou fut un grand succès et j’eûnmes lé pliaisi dé ouie not’ dgaîngue Jèrriaise “Badlabècque” tchi nos donnit un mangnifique concèrt lé Sanm’di au sé.

En 2020, ch’ ’tait acouo eune fais à Jerri d’organniser la Fête. Malheutheusement, à cause du virus, la Fête fut annulée. Mais j’attendons fête 2021 pouor èrtrouver nos couôsîns Nouormands et pouor célébrer not’ mangnifique langue et nos mangnifiques traditions.